Muzika skeĉo


ĉefa paĝo -> artikoloj -> muzika skeĉo

pri la skeĉo

Komuna verko de Till C. SCHÖNBERNER kaj mi. Ni skribis ĝin dum la Internacia Junulara Festivalo (IJF) en 2001, gajnante la unuan premion dum la konkurso "La Corrida" kiu okazis kadre de la internacia vespero. La teksto grandparte konsistas el citaĵoj de esperantlingvaj kantotekstoj!

la skeĉa dialogo

T.: Bedaŭrinde mi ne povis veni al la IJF ĉijare. Sed mia amiko Gennaro Pescatore ja estas tie. Mi altelefonu lin kaj informiĝu pri la certe bonega etoso en Italio. Kie mi havas la numeron?
G.: Pronto. Pronto? Pronto???
T.: Ciao Gennaro! Estas mi, Tille Bellafonte.
G.: Ah, Tille, saluton!
T.: Kiel statas la aferoj kun Liza?
G.: Liza ĉiam volis pentri bildojn... / kaj ankaŭ mi, sed ne kun sama ĝu'.
T.: Sed mi pensis ke vi ambaŭ estas kvazaŭ geamanta paro.
G.: Mi ŝatas ŝin...
T.: Jes, mi scias.
G.: Ŝi ŝatas min...
T.: Tiel ŝajnas! Do, povus esti simple...
G.: Sed estas ne. // Mi demandas min kiam mi estas kun ŝi: Ĉu mi estas sola? // Ĉiu ajn vespere ekas enespera ĉas' / de trinkejo al trinkejo / por konsolo en la glas'.
T.: Hej, la vivo ne finiĝas...
G.: ...ĝi persiste iras plu.
T.: Sed kia estas la renkontiĝo ĝenerale?
G.: Loĝi kostas tro da mono, / farbo falas de l' plafono. // Malvarmas kaj mi frostas / sed plej en mia kor' / min mankas ĉia varmo.
T.: Vi frostas? Mi pensis ke estus varme en Italio.
G.: Neĝo dancas en la stratoj / Jen sezono de mallum' kaj malfeliĉ'.
T.: Kion pri via amiko Martena kaj tiu Polina?
G.: Tritaga afero - la vivo iras plu. // Li ploras dum la nokto kaj cerbumas dum la tag'.
T.: Povra Marteno, povra mizero. Kaj ĉu vi ambaŭ partoprenas la teman programon? Mi ja esperas ke la temo "Odiseo" nur limiĝas al la prelegoj kaj ne al la doma strukturo mem.
G.: Nun estas jam la tria foj' / dum tiu ĉi semajno nur / ke iras mi sur sama voj' // en la labirinta nun // kaj kienajn mi iras - rekondukas ĉiu voj'
T.: Mi ne sciis ke ekzistas tiom multe da malĝoj'. Do la festivalejo ŝajne ne estas laŭ via gusto. Sed ĉu vi aĉetis bileton por la ekskurso?
G.: Malprave pensis mi: pli bone sen ol kun / kaj ŝparis monon por bileto al la lun'. (faras drinkantan mangeston)
T.: Do, dum kelkaj aliaj renkontiĝoj ni glitkuras sur ĉielo, inter steloj kaj planedoj...
G.: Marso aŭ Aldebaran, stelo sen samidean', vere mankis ies akompan'. // post ses horoj en vento kaj pluvo mi frostis tiel.
T.: Do, mi nur bonfartas en la kaoso.
G.: Jen vi kaj mi - akvo kaj oleo.
T.: Malbonulo, malbonulo!
G.: Mi ne postulas ĉiun respondon, nek la klarigon al ĉio ĉi. Respondu nur tion: Kiu frenezas? Ĉu la mondo aŭ mi?
T.: Bone, mi devas fini la telefonadon. Ĉu ne ankaŭ ĉe vi nun komenciĝas la vespermanĝo?
G.: (rigardante) Ho, kia malbonŝanc'! Startas nun milito!
T.: Ĉu vi pentas nun ke vi militservis?
G.: Ne!

lastaj ŝanĝoj: 2003-04-23 (ISO 8601).
kontakto: vidu ĉe la ĉefa paĝo.