Bela renkontiĝo

---

ĉefa paĝo -> verkitaj kantotekstoj -> Bela renkontiĝo

---

Mian duan hiphopon mi skribis dum pli ol du jaroj (inter 1998 kaj 2000). Grandan parton de la muziko mi jam havis en februaro 1998 kaj ankaŭ la ĝenerala ideo kaj unuaj tekstlinioj venis ĉirkaŭ en tiu tempo. Sed daŭris ĝis la KEF 2000 en Helsinki por fini ĝin. Tie mi ankaŭ prezentis ĝin dufoje, dum la "espoteko" kun la de mi preparita muziko kaj dum la adiaŭa koncerto kun la elstara helpo de la muzikgrupo "Esperanto Desperado". Kiom bona sperto!

La teksto estis cetere origine inspirita de la germanlingva hiphopkanto "Letzte Nacht" de Creme de la Creme al kies muziko ĝi repeblas.

Hej!
Finfine la ferioj komenciĝis nun por mi
Refreŝiĝo de la ĉiutaga streĉo estos ĝi
la Esperanto-renkontiĝo al kiu mi vojaĝas
Ĉar amikojn mi revidos antaŭĝojo envizaĝas
Do trajnoj plenŝtopitaj min ne povas vere ĝeni
kaj diversaj malfruiĝoj ne sukcesas min reteni
Nur malfrue mi alvenas kaj maltrafas vespermanĝon
La vendejoj jam fermiĝis do mi manĝas nur oranĝon
Sed malgraŭ ĉiuj tiuj aĵoj mi ne estas malfeliĉa
(Ĉar) brakumad' de amantino mia estos jam sufiĉa
por ene plene kontentigi min kaj doni al mi pacon
ĉar kie amo regas la malbon' ne havas spacon
Do mi serĉas kaj mi trovas la amikinon mian
Konfuziĝas mi vidante ke ŝi kisas jen alian
Ke ŝi ne plu amas min ŝi senhezite al mi diras
Kun mia plej bona amiko brak' en brako ŝi foriras
Finfine al mi restas mia frakasita koro
Sed se enkape estas ĉiukaze jam doloro
Mi ankaŭ povas ebriiĝi - mi decidas retiriĝi
kaj kun la kunportitaj bierboteloj kontentiĝi

refreno:
Hej-jo! Hej-jo! Hej-jo! Hej-jo!
Bela renkontiĝo...

Mi vekiĝas kaj konstatas ke mi malbone fartas
Ne nur kore ankaŭ korpe tio tago aĉe startas
Mi bezonas iun helpon kaj demandas do amikojn
sed anstataŭe mi de ili ricevas nur kritikojn
Ili min ne plu komprenas kaj tio min tre ĝenas
Normalkaze tiuj bonaj uloj vere min subtenas
Do la tempo alvenas kiam mi distriĝon volas
Se jam tute mi solas kaj neniu min konsolas
Sed la distraj kaj vesperaj programoj vere aĉas
Mi ankoraŭ nokte serĉas ion kio al mi plaĉas
(Kaj) nek trinkejo nek gufujo tre bone funkcias
La trinkaĵoj multekostas do neniu ebrias
Eĉ sur la dancejo mi restas sen sukceso
ĉar verdire malfacilas iu ajn progreso
se dancantoj kaj precipe belulinoj malmultas
aĉegas la muziko kaj diskĵokeo stultas
Denove mi ekdrinkus por forgesi la mizeron
sed miaj kunĉambranoj jam fortrinkis la bieron
mi provas endormiĝi sed mi tamen restas veka
ĉar ekbruas de apude la muziko diskoteka

(refreno)

Vespero antaŭlasta nur duona post la naŭa
Ĉiu tago ĝis nun estis pli terura ol l' antaŭa
Post la lastaj okazaĵoj mi verdire malkontentas
Kiel reĝo de doloro mi interne min nun sentas
Mi malamas tiun mondon ĉar ĝi ŝajnas tro kruela
Kiam venas al mi ino nekonata kaj tre bela
Ni ekbabilas kaj montriĝas ke ŝi estas vere ĉarma
Ankaŭ plaĉas mi al ŝi kaj mia koro iĝas varma
En diskejo poste kune ni malrapide dancas
Intertempe mi ekpensas ke hodiaŭ mi bonŝancas
La reston de la renkontiĝo mi komplete ĝuas
Kun mia nova amikino mi vere malenuas
Do la moralo de la rakontaĵo estas eble jena:
Ne perdu la humuron kiam vivo estas plena
De aĵoj malagrablaj kaj tagoj malbelegaj
personoj malafablaj kaj horoj malhelegaj
Ĉiam restu optimisma kaj (re)agu kun espero
se vi estas realisma tiom helpos tiu vero
Vivo povas pliboniĝi kaj ne konas konstanton
homo kiu kredis tion kreis Esperanton

(refreno)