Anstataŭ ampoemo


ĉefa paĝo -> verkitaj kantotekstoj -> Anstataŭ ampoemo

pri la teksto

Dum la KEF 2000 en Helsinki ĉiu estis petata verki ion por la ampoema vespero. Ankaŭ mi promesis do kontribui sed dum unu tago ne venis la inspiro por realigi enkapajn ideojn. Do mi pripensis rifuzi pri la afero. Sed la enkondukaj vortoj de la respondeculo pri la vespero, Miguel Fernández, kaj la unuaj ampoemoj tiom kortuŝis min ke mi tuj verkis dudeklinian anstataŭaĵon kiun mi prezentis ankoraŭ samvespere. Kaj poste mi eĉ verkis pli... sed tio legeblas sur alia paĝo.

Anstataŭ ampoemo

poemo

Aŭskultantoj estimataj
Belulinoj tre ŝatataj
Certe mi prezentus ion
Se mi havus nur la scion
Kaj la tempon verki gustan
Ampoemon ritme ĝustan
Vorte bone pripensatan
Kaj ne ion stile platan

Por repanta juna viro
Amo estas la inspiro
Aŭtomate ne funkcias
Eĉ se mi post vin' ebrias
Mi ne trovas bonajn rimojn
Por esprimi miajn timojn
La doloron kaj sopiron
Korpan ĝuon kaj deziron

Hodiaŭ do mi min retenas
Kaj vin nun ne plue ĝenas
Iun tagon vi komprenos
Ĉar mi minacas: Mi revenos!

lastaj ŝanĝoj: 2003-05-06 (ISO 8601).
kontakto: vidu ĉe la ĉefa paĝo.