Amdeklaro al la muziko


ĉefa paĝo -> verkitaj kantotekstoj -> Amdeklaro al la muziko

pri la teksto

Tiun poemon mi verkis dum la KEF 2000 en Helsinki, pli precize dum kaj post la elektra koncerto de Persone kaj dum la ekskurso al Suomenlinna. Post kiam mi dum du jaroj verkis mian duan hiphopon, mi sukcesis skribi 24 strofojn en malpli ol unu tago! Mia blokiteco rilate al tekstoverkado ŝajne to tute foriris. La etoso de la Persone-koncerto kaj la Finna naturo kaj trankvileco estis tre inspiraj. Mi prezentis la poemon dum la vespero de la talentoj. Atentu pri la multaj sekretaj alludoj kaj duoblaj/trioblaj signifoj de kelkaj frazoj!

Amdeklaro al la muziko

poemo

1a-8a strofo9a-16a strofo17a-24a strofo
Muziko estas kiel drogo
ĉar mi volas ĉiam pli
Sed ĝi estas ne mensogo
Bone dependigas ĝi

Homoj venis kaj foriris
Amis mi de foj' al foj'
Sed muzik' min akompanis
dum la tuta vivovoj'

Kun muziko mi kreskiĝis
Kun muziko mortos mi
kaj al multaj novaj lokoj
daŭre min alportas ĝi

Muziko, mia koramiko
dum la jaroj de solec'
bona helpo al la celo
dum momentoj de molec'

Kiam trovis mi Jerikan
rozon en la vivdezert'
kaj ni dancis malrapide
eĉ se mi sen granda spert'

Kiam la rilat' finiĝis
vi konsolis en la blu'
kaj mi baldaŭ ekkomprenis
ke la vivo iras plu

Ankaŭ kiam mi pripensis
ĉu ne fini ĉion ĉi
vi magie min retenis
Vivo, ofte strangas vi

Muziko, mia savboato
en la maro de la viv'
gvidas vi min trans la ŝtormoj
restas sen alternativ'

En diskejo belulino
scivolemas ĉu mi tre
ŝatas iom Amplifiki
Certe gravas tute ne!

Ĉu mi estas Brava bardo
aŭ ĉu Sola dum IS
mi muzikon aŭskultigas
ĉar mi estas ja DĴ

Kun muzik' mi fartas bone
Ĝi ne estas truka ŝajn'
kaj kortuŝas min Persone
Mi ne pentas iam ajn

Muziko estas kuracilo
kontraŭ ĉiu vivmalsan'
kontraŭ Paderborna tristo
Kun skribilo en la man'

Trankviligas aŭskultado
en la ĉiutaga streĉ'
kaj jam 62 minutoj
helpas tutan jaron eĉ

Kun aŭ sen neologismoj
Dum la lojl' en Finna saŭn'
kaj en la plej finstra nokto
fnizas mi, ludema klaŭn'

Saldezerto, salacido
aŭ ĉu eble Dolcxamar?
Ĉu vi pretas interpreti
tiun tekston sen vortar'?

Reflektiĝas mi en kanto
do la ul' en la spegul'
mi, eterna esperanto
kaj denaska frenezul'

Nu, muziko pli ŝvitigas
ol beleco de virin'
Ĉu vi eble min ne kredas?
Dum koncert' rigardu min!

Muziko nutras kiel suko
ebriigas pli ol vin'
Eĉ klingona volapuko
povus kontentigi nin

Ĉar la plej diversaj lingvoj
sonas bele kun muzik'
kaj mesaĝo ĉiam restas
malgraŭ ĉiu ajn kritik'

Trans la politikaj muroj
kaj fosaĵoj flugas ĝi
la portanto de kulturoj
kaj veraĵoj ĉie ĉi

Muziko estas ununura
de pratempo ĝis la nun'
korojn movas pli ol steloj
ĉu venuso, ĉu la lun'

Kaj eĉ se la tuta mondo
estas granda Maskobal'
per ĝi trovos mi la veron
en homara karneval'

Muziko donas la respondon
al animo, al spirit'
kaj ĝi ŝanĝas pli la mondon
ol terura mondmilit'

Sed mi finas la rakonton
ne kun trista ironi'
ĉar pro ĉiuj tiuj kaŭzoj
ho muzik', vin amas mi

plia strofo (kreita dum la adiaŭo:)
Sciu ke mi certe estos
se vi nun forlasas min
Esperanto-Desperado
almenaŭ ĝis la noktofin'

lastaj ŝanĝoj: 2003-05-06 (ISO 8601).
kontakto: vidu ĉe la ĉefa paĝo.